究竟點解會有「何韻詩被迫協辦」？
話說..
個幾月前舊同事康家俊（是次HOCC演唱會製作總監）搵我，問我有冇興趣做一Part幾分鐘現場版《勁曲金曲》玩下，只係幾分鐘，搬歌過場，心諗好簡單啫，我第一個反應係答應咗，但下一秒鐘我已經非常猶疑了，因為我知道，以我哋低能仔性格，搞下搞下就唔會係幾分鐘搬歌過場咁簡單..
果然過完書展之後，我再諗下呢件事嘅時候，就覺得就咁搞現場版《勁曲金曲》太悶喇，最後單方面強行決定搞一個《勁曲金曲優秀選》。
之所以點解叫「何韻詩被迫協辦」就係咁樣樣解..
話晒我哋都係大大台，明星如雲，壟斷咗大中華市場，收視下下過四十點，搞起Show上嚟，其實係好容易喧賓奪主。難得HOCC咁都肯，我諗返起都覺得佢好痴線。
而事實證明佢都真係唔洗驚，因為佢同康家俊、創作總監畢明仲有佢哋團隊好多好多人，一齊做咗個雅俗共賞嘅Show出嚟（「雅俗共賞」喺我世界當中係創作最高級別）。我冇客氣，我份人雖然係出咗名Nice，又多笑容，但就唔識打客氣功，好就係好，唔好就最多唔出聲……我同畢明講，話睇呢個Show，我先唔覺得自己嘥緊時間。
好似佢哋仲會巡迴香港去細場搞Show，那又會是另一番感受，有機會你們都去看看吧。
作為主辦方（我指我…），最後想多謝所有得獎歌手百忙之中抽空出席，我保證所有獎項都係公開內定，公平造馬，你哋都係由廣大市民（大概有2個）投選出嚟，絕對係實至名歸。
仲要多謝我公司同事千忙之中抽空搞呢件事，多謝「抗胃炎」一路呻多嘢做但其實見到偶像不知幾High，多謝崔建芒臨時臨急畀人推咗上台Live真做但又做得幾好，多謝設計部阿Ching及其團隊and影像部阿Zack及其團隊再次省靚毛記個招牌，仲有幫手唱歌嘅同事，當然仲要多謝我自己、Johnathan同Kyle，三個無聊仔寫埋啲咁低質嘅歌詞。
我本身諗住打兩句就算，點知打下打下又咁多字..
最後最後要多謝某位匿名女歌手借出友台獎座，等我哋完成到最尾兩個獎…
HOCC 毛記電視 畢明 方健儀 Akina Fong「多謝支持 後會有期」 AnthonyWongYiuMing黃耀明 崔建芒（Amango） gregory wong 王宗堯 Gregory 河國榮 葉蘊儀 Gloria Yip グロリア・イップ
Search